زمبابوے میں مسافروں سے بھری کشتی الٹ گئی، 44 افراد ہلاک

زمبابوے اور زیمبیا کی سرحد پر واقع جھیل کریبا (Lake Kariba) میں گنجائش سے زائد مسافروں کو لے جانے والی کشتی الٹنے کے نتیجے میں کم از کم 44 افراد ہلاک ہو گئے، جبکہ متعدد افراد تاحال لاپتا ہیں۔ حادثے کی اطلاع ملتے ہی پولیس، سول پروٹیکشن یونٹ اور غوطہ خوروں نے جھیل میں ریسکیو آپریشن شروع کر دیا، جس کے دوران اب تک 77 افراد کو محفوظ مقام پر منتقل کیا جا چکا ہے۔

اطلاعات کے مطابق کشتی کی مقررہ گنجائش 90 افراد کی تھی، لیکن اس میں عملے اور بچوں سمیت اندازاً 153 سے زائد افراد سوار تھے۔ زندہ بچ جانے والے مسافروں کا کہنا ہے کہ روانگی کے 30 منٹ بعد ہی جھیل میں شدید لہروں کے باعث کشتی میں پانی بھرنا شروع ہو گیا تھا، تاہم کپتان نے مسافروں کی کنارے واپس لوٹنے کی التجا پر توجہ نہیں دی۔ عالمی سطح پر پانی کے حجم کے لحاظ سے سب سے بڑی مصنوعی جھیلوں میں شمار ہونے والی جھیل کریبا مقامی نقل و حمل کا اہم ذریعہ ہے، جہاں اس سے قبل 2014 میں بھی ایک بحری حادثے کے نتیجے میں 26 افراد جاں بحق ہوئے تھے۔