ایرانی صدر کا جاپانی وزیراعظم سے رابطہ، خطے کی صورتحال پر گفتگو

ایرانی صدر مسعود پزشکیان نے جاپان کے وزیراعظم سے ٹیلیفونک رابطہ کر کے خطے کی مجموعی صورتحال پر تفصیلی تبادلہ خیال کیا ہے۔ گفتگو کے دوران صدر پزشکیان نے واضح کیا کہ ایران خطے میں کسی قسم کی بدامنی کا خواہاں نہیں ہے، تاہم امریکا اور صیہونی حکومت کی مسلسل جارحانہ کارروائیوں نے مشرقِ وسطیٰ کے امن و استحکام کو شدید نقصان پہنچایا ہے۔

ایرانی صدر نے نشاندہی کی کہ امریکی و اسرائیلی حملوں کے نتیجے میں سپریم لیڈر، عام شہریوں اور میناب اسکول کے بچوں کی شہادتیں ہوئیں، جبکہ شہری بنیادی ڈھانچے (انفراسٹرکچر) کو بھی نشانہ بنا کر تباہ کیا گیا۔ انہوں نے زور دیا کہ ایران نے بین الاقوامی قوانین کی حدود سے باہر کوئی قدم نہیں اٹھایا اور ہمیشہ اپنے پڑوسی ممالک سے تعلقات کی استواری کے لیے مثبت کاوشیں کی ہیں۔

مسعود پزشکیان نے مزید کہا کہ دشمن ملک کے اندرونی انتشار اور بدامنی کے ذریعے اسلامی نظام کو سرنگوں کرنا چاہتا ہے اور موجودہ کشمکش ماضی کی نسبت کہیں زیادہ پیچیدہ ہے۔ انہوں نے قومی یکجہتی پر زور دیتے ہوئے کہا کہ ایران کو ایک مشن اور مخصوص اہداف کے تحت متحد ہو کر آگے بڑھنا ہوگا اور کسی صورت عوام کو خود سے دور نہیں ہونے دیا جائے گا۔