ایران اب مشرق وسطیٰ کا بدمعاش نہیں رہا، پاسداران انقلاب تباہ ہوچکی: ٹرمپ

امریکی صدر ڈونلڈ ٹرمپ نے سوشل میڈیا پر جاری اپنے ایک تند و تیز بیان میں کہا ہے کہ ایران اب مشرقِ وسطیٰ میں طاقتور یا بدمعاش نہیں رہا بلکہ وہ صرف باتیں کرتا ہے اور اس میں کسی بھی قسم کے عملی اقدامات کرنے کی صلاحیت ختم ہو چکی ہے۔ امریکی صدر نے دعویٰ کیا کہ واشنگٹن نے آبنائے ہرمز (Strait of Hormuz) پر مکمل کنٹرول حاصل کر لیا ہے اور امریکا اس ناکہ بندی و کنٹرول کو آئندہ بھی برقرار رکھنے کا ارادہ رکھتا ہے۔

ڈونلڈ ٹرمپ نے امریکی بحری ناکہ بندی کو “فولادی دیوار” قرار دیتے ہوئے دعویٰ کیا کہ ایران کی پاسدارانِ انقلاب تباہ ہو چکی ہے، اس کے اہلکار فرار ہو رہے ہیں اور پاسدارانِ انقلاب سمیت فوجی تنخواہوں سے بھی محروم ہو چکے ہیں۔ ان کا کہنا تھا کہ ایران کے پاس اب نہ فعال بحریہ باقی بچی ہے اور نہ ہی فضائیہ، جبکہ ملک میں مہنگائی 300 فیصد تک پہنچ جانے کی وجہ سے معیشت تباہ حال ہو چکی ہے۔ انہوں نے مزید کہا کہ ایرانی قیادت کی صورتحال انتہائی غیر یقینی ہے اور ایران اب صرف جعلی خبروں کا سہارا لے رہا ہے۔