ایک ہی فلائٹ نمبر کے دو طیارے آمنے سامنے، مسافر بال بال بچ گئے

امریکا میں ایئر ٹریفک کنٹرولر کی بروقت حاضردماغی اور مہارت نے ایک ہی فلائٹ نمبر سے پرواز کرنے والے دو مسافر طیاروں کو ممکنہ حادثے اور تصادم سے بچا لیا۔ امریکی فضائی کمپنی ‘امریکن ایئرلائنز’ کے دو مختلف طیارے اتفاقاً ایک ہی کال سائن اور فلائٹ نمبر 2482 کے تحت پرواز کر رہے تھے، جن میں سے ایک طیارہ شکاگو سے فینکس پہنچ رہا تھا جبکہ دوسرا فینکس ایئرپورٹ سے پرواز کر کے روانہ ہو رہا تھا۔ دونوں طیاروں کا ایک ہی فلائٹ نمبر ہونے کی وجہ سے شدید خطرہ پیدا ہو گیا تھا کہ پائلٹس ایئر ٹریفک کنٹرول کی جانب سے ملنے والی ہدایات کو غلط سمجھ کر کسی خطرناک صورتحال سے دوچار ہو سکتے ہیں، بالخصوص اس وقت جب دونوں کے فضائی راستے ایک دوسرے کے انتہائی قریب آ چکے تھے۔

صورتحال کی نزاکت کو فوری بھانپتے ہوئے ایئر ٹریفک کنٹرولر نے حاضر دماغی کا مظاہرہ کیا اور دونوں طیاروں کو باہم الجھن سے بچانے کے لیے الگ الگ شناختی نام دے دیے، جس کے تحت آنے والے طیارے کو ‘ارائیول’ اور جانے والے طیارے کو ‘ڈیپارچر’ کہہ کر ہدایات دینا شروع کر دیں۔ اس کے ساتھ ہی کنٹرولر نے فضا میں حفاظت کو یقینی بنانے کے لیے لینڈنگ کرنے والے طیارے کو زیادہ بلندی پر رکھا جبکہ ٹیک آف کرنے والے طیارے کو عارضی طور پر مزید اوپر جانے سے روک دیا، جس سے دونوں کے درمیان محفوظ فاصلہ برقرار رہا۔ کنٹرولر کے اس ہنگامی و سمارٹ اقدام کے باعث دونوں پروازیں بحفاظت اپنی منزلوں کی جانب گامزن ہو گئیں اور ایک بڑا حادثہ ٹل گیا۔