سوشل میڈیا ضوابط کی خلاف ورزی، متحدہ عرب امارات نے ساڑھے 3 ہزار پاکستانی بے دخل کردیئے

اسلام آباد: قومی اسمبلی کو بتایا گیا ہے کہ متحدہ عرب امارات میں سوشل میڈیا سے متعلق قوانین کی خلاف ورزی پر تقریباً ساڑھے 3 ہزار پاکستانی شہریوں کو ملک بدر کر کے پاکستان واپس بھیج دیا گیا۔

ایوان کو دی گئی بریفنگ کے مطابق ایران اور امریکا کے درمیان کشیدگی کے دوران بعض پاکستانی شہریوں نے متحدہ عرب امارات کے سوشل میڈیا ضوابط کی خلاف ورزی کی، جس کے نتیجے میں متعلقہ حکام نے ان کے خلاف کارروائی کرتے ہوئے انہیں بے دخل کر دیا۔

حکام نے بتایا کہ بے دخل کیے گئے پاکستانیوں کی جائیدادوں اور دیگر اثاثوں کی منتقلی کا عمل ان کے ورثا کے حوالے سے کیا جا رہا ہے تاکہ متاثرہ خاندانوں کو کسی قسم کی دشواری کا سامنا نہ کرنا پڑے۔

بریفنگ میں مزید کہا گیا کہ اگر کسی متاثرہ شہری یا اس کے اہل خانہ کو جائیداد یا دیگر قانونی معاملات میں مشکلات درپیش ہوں تو وہ وزارت خارجہ سے رابطہ کر سکتے ہیں، وزارت ہر ممکن معاونت فراہم کرے گی۔