ٹویٹ کرنا اور سوال اٹھانا بھی جرم بن گیا ہے،سردار اختر مینگل

سردار اختر مینگل نے قومی کانفرنس سے خطاب کرتے ہوئے کہا کہ ملک میں ایسا گھٹن زدہ ماحول پیدا ہو چکا ہے جہاں ایک ٹویٹ کرنا اور سوال اٹھانا بھی جرم بن گیا ہے، جس سے مسائل مزید بڑھ رہے ہیں۔ انہوں نے کہا کہ ہمیں ماضی کی غلطیوں کا اعتراف کرنا ہوگا اور افراد کے بجائے ان مافیاز کو ذمہ دار ٹھہرانا ہوگا جو حالات کے اصل ذمہ دار ہیں۔

سردار اختر مینگل نے ماضی کے ادوار پر تنقید کرتے ہوئے کہا کہ ایوب خان، ضیاء الحق اور جنرل مشرف کے اقدامات نے قوم کو نقصان پہنچایا۔ انہوں نے ماما قدیر اور ماہ رنگ بلوچ کی مثال دیتے ہوئے کہا کہ بلوچستان کے عوام اپنے حقوق کے لیے اٹھ کھڑے ہوئے مگر ان پر تشدد کیا گیا۔

ان کا کہنا تھا کہ نگران حکومت قوم کے مینڈیٹ کی گورکن ثابت ہوئی جبکہ آج بلوچستان کے لوگ ایک وقت کی روٹی کے محتاج ہو چکے ہیں، جو ریاست کے لیے لمحۂ فکریہ ہے۔