امریکی صدر ٹرمپ نے ایران کی نئی تجاویز ناقابل قبول قرار دے کر مسترد کردیں

امریکی صدر ڈونلڈ ٹرمپ نے ایران کی جانب سے جنگ کے خاتمے کے لیے پیش کی گئی نئی تجاویز کو مسترد کرتے ہوئے انہیں مکمل طور پر ناقابل قبول قرار دے دیا ہے۔

صدر ٹرمپ نے اپنے سماجی رابطے کے پلیٹ فارم ٹروتھ سوشل پر جاری بیان میں کہا کہ انہوں نے ایران کے نام نہاد نمائندوں کی جانب سے بھیجی گئی حالیہ تجاویز کا جائزہ لیا، تاہم یہ تجاویز انہیں پسند نہیں آئیں اور واشنگٹن کے لیے قابل قبول نہیں ہیں۔

امریکی صدر کا کہنا تھا کہ موجودہ صورتحال میں ایران اور امریکا کے درمیان اختلافات بدستور برقرار ہیں اور دونوں ممالک کے مؤقف میں واضح فاصلے موجود ہیں۔

ذرائع کے مطابق تہران نے اپنی جوابی تجاویز پاکستانی ثالثوں کے ذریعے امریکی حکام تک پہنچائی تھیں تاکہ کشیدگی میں کمی اور ممکنہ جنگ بندی کے لیے راستہ ہموار کیا جاسکے۔

سیاسی مبصرین کے مطابق امریکی ردعمل کے بعد خطے میں سفارتی کوششوں کو مزید چیلنجز کا سامنا ہوسکتا ہے۔