ٹرمپ ایران میں ایسا لیڈر چاہتے ہیں جو امریکا مخالف نعرے نہ لگائے، وائٹ ہاؤس

واشنگٹن: وائٹ ہاؤس کی ترجمان کیرولین لیوٹ نے کہا ہے کہ امریکی صدر ڈونلڈ ٹرمپ ایران میں ایسا دوست لیڈر دیکھنا چاہتے ہیں جو امریکا کے خلاف نعرے بازی نہ کرے۔

پریس بریفنگ کے دوران انہوں نے بتایا کہ امریکا اس وقت ایران کے خلاف بڑے پیمانے پر جنگی کارروائی میں مصروف ہے اور آپریشن کئی ہفتوں پر محیط ہوگا، جبکہ جنگ اپنے پچیسویں روز میں داخل ہو چکی ہے۔

ترجمان کے مطابق امریکا نے ہزاروں اہداف کو نشانہ بنایا ہے اور ایران کی بحری و دفاعی صلاحیت کو شدید نقصان پہنچایا گیا ہے، جبکہ ایران کی جوہری صلاحیتیں بھی تقریباً ختم ہو چکی ہیں۔

کیرولین لیوٹ کا کہنا تھا کہ صدر ٹرمپ ایران کے ساتھ مثبت اور نتیجہ خیز مذاکرات میں بھی مصروف ہیں، تاہم اگر ایران نے شرائط قبول نہ کیں تو مزید سخت کارروائی کی جائے گی۔

انہوں نے کہا کہ جنگ سے قبل قانون سازوں کو اعتماد میں لیا گیا تھا اور اب بھی انہیں بریفنگ دی جا رہی ہے، جبکہ صدر ٹرمپ ملکی مفاد میں فیصلے کرنے کے لیے بااختیار ہیں۔