پیٹرولیم مصنوعات:حکومتی اقدام کو “لوٹ مار” اور “ڈاکہ” قرار,حافظ نعیم الرحمان

امیر جماعت اسلامی حافظ نعیم الرحمان نے حکومت کی جانب سے پیٹرولیم مصنوعات کی قیمتوں میں روزانہ کی بنیاد پر ردوبدل کے فیصلے کو شدید تنقید کا نشانہ بناتے ہوئے اسے عوام کی جیب پر براہِ راست ڈاکہ قرار دیا ہے۔ سماجی رابطے کی ویب سائٹ ‘ایکس’ پر اپنے بیان میں حافظ نعیم الرحمان نے کہا کہ حکومت کا یہ فیصلہ عوام کے ساتھ لوٹ مار کے مترادف ہے۔ انہوں نے سوال اٹھایا کہ اتحادی حکومت پیٹرول پر عائد ۱۲۰ روپے کے ٹیکسز کا خاتمہ کیوں نہیں کرتی؟ امیر جماعت اسلامی کے مطابق لیوی کا پیٹرول کی قیمت سے کوئی تعلق نہیں اور حکومت اس کے نام پر بھتہ خوری کر رہی ہے۔ حافظ نعیم الرحمان نے مزید کہا کہ ایک ناکام حکومت اپنی پالیسیوں کی ناکامی کا بوجھ مسلسل عوام پر ڈال رہی ہے، جس سے ملک میں مہنگائی کا طوفان مزید شدت اختیار کر گیا ہے۔