فارما سیوٹیکل صنعت کو عالمی سطح پر نمایاں کرنے کا منصوبہ پیش کر دیا: مصطفیٰ کمال

وفاقی وزیر صحت مصطفیٰ کمال نے فارما سیوٹیکل صنعت کو عالمی سطح پر نمایاں کرنے کا اہم منصوبہ پیش کرتے ہوئے کہا ہے کہ پاکستان اور چین کے درمیان صحت کے شعبے میں سرمایہ کاری کے نئے اور شاندار مواقع پیدا ہو رہے ہیں۔ میڈیا سے گفتگو کرتے ہوئے انہوں نے بی ٹو بی (B2B) کانفرنس کے انعقاد پر چین میں پاکستان کے سفیر کے کردار کو سراہا۔ اس موقع پر وزیر اعظم کے معاون خصوصی ہارون اختر نے پاکستان میں بیرونی سرمایہ کاری نہ آنے کے تاثر کو مسترد کرتے ہوئے کہا کہ جو لوگ ایسا کہتے ہیں وہ اسلام آباد آکر دیکھیں جہاں اس وقت 350 سے زائد چینی سرمایہ کار موجود ہیں۔ انہوں نے مزید انکشاف کیا کہ اس وقت چین کے ساتھ 700 سے 800 مفاہمتی یادداشتوں (MoUs) پر کام جاری ہے جو ملک میں نئی سرمایہ کاری کی راہ ہموار کریں گے۔