پاسدارانِ انقلاب کا قطر میں امریکی العدید ایئر بیس کو نشانہ بنانے کا دعویٰ

ایران کی پاسدارانِ انقلاب نے دعویٰ کیا ہے کہ انہوں نے قطر میں واقع امریکی “العدید ایئر بیس” کو نشانہ بنایا ہے، جس کے نتیجے میں وہاں نصب ریڈار سسٹم اور فضائی ایندھن فراہم کرنے والے طیارے تباہ ہو گئے ہیں۔ پاسدارانِ انقلاب نے امریکا اور اس کے فوجی اڈوں کی میزبانی کرنے والے ممالک کو سخت وارننگ دیتے ہوئے کہا ہے کہ وہ سرخ لکیروں کو عبور کرنے سے گریز کریں، کیونکہ عوام اور شہری انفراسٹرکچر کو نشانہ بنانے کی بہت بھاری قیمت چکانا ہوگی۔ ایرانی حکام کا کہنا ہے کہ اگر دشمن نے حملے جاری رکھے تو ایران مزید فیصلہ کن جوابی کارروائیاں کرے گا۔ فی الحال ایرانی حکام کی جانب سے اس کارروائی کی مزید تفصیلات جاری نہیں کی گئیں اور نہ ہی امریکی حکام کی طرف سے اب تک کوئی باضابطہ ردعمل سامنے آیا ہے۔