27 جولائی کو جب کشمیر میں ڈبے کھلیں گے تو ہر طرف شیر ہی شیر ہوگا: مریم اورنگزیب

سینئر وزیر پنجاب مریم اورنگزیب نے راولپنڈی میں ایک انتخابی جلسے سے خطاب کرتے ہوئے دعویٰ کیا ہے کہ 27 جولائی کو جب آزاد کشمیر میں انتخابی ڈبے کھلیں گے تو ہر طرف مسلم لیگ (ن) کا انتخابی نشان ‘شیر’ ہی نظر آئے گا۔ انہوں نے مخالفین پر تنقید کرتے ہوئے عوام سے کہا کہ جو بھی آپ سے ووٹ مانگنے آئے، اس سے لازمی پوچھیں کہ وہ اپنے صوبے میں کیا کارکردگی دکھا کر آئے ہیں؟ مریم اورنگزیب نے واضح کیا کہ کشمیر کی ترقی پاکستان کی خوشحالی سے جڑی ہوئی ہے۔ انہوں نے یاد دلایا کہ نواز شریف نے 13 ویں ترمیم کے ذریعے کشمیریوں کو ان کے حقوق دیے اور تاریخی بجٹ فراہم کیا، جبکہ موجودہ وزیراعظم شہباز شریف نے بھی کشمیر کے لیے 100 ارب روپے کا خطیر ترقیاتی بجٹ مختص کیا ہے۔ انہوں نے عزم کا اظہار کیا کہ جس طرح پنجاب میں وزیراعلیٰ مریم نواز نے ترقی کی مثال قائم کی ہے، بالکل اسی طرز پر کشمیر میں بھی ریکارڈ ترقیاتی کام کروائے جائیں گے۔