پٹرولیم قیمتوں کی ڈی ریگولیشن مسترد، پٹرول پمپ مالکان کی ہڑتال کی دھمکی

آل پاکستان پٹرول پمپ اونرز ایسوسی ایشن نے حکومت کی مجوزہ پٹرولیم پرائس ڈی ریگولیشن پالیسی کو یکسر مسترد کرتے ہوئے خبردار کیا ہے کہ اگر یہ فیصلہ واپس نہ لیا گیا تو آئندہ ہفتے ملک گیر احتجاج اور ہڑتال پر غور کیا جائے گا۔ ایسوسی ایشن کے وائس چیئرمین نعمان علی بٹ نے حکومت سے پالیسی پر نظرثانی کا مطالبہ کرتے ہوئے کہا کہ مسائل کا بوجھ پٹرول پمپ مالکان پر نہ ڈالا جائے اور آئل مارکیٹنگ کمپنیوں کے ساتھ قیمتوں کے تعین سے قبل تمام اسٹیک ہولڈرز کو اعتماد میں لیا جائے۔ ان کا کہنا تھا کہ ملک بھر کے تقریباً 15 ہزار پٹرول پمپ مالکان نئی پالیسی پر شدید تحفظات رکھتے ہیں کیونکہ اس سے آئل ٹینکرز، ٹرانسپورٹیشن اور قیمتوں کے تعین کا موجودہ نظام بری طرح متاثر ہوگا۔ انہوں نے حکومت پر زور دیا کہ یکطرفہ فیصلوں کے بجائے پٹرول پمپ مالکان سے مشاورت کر کے ایک قابلِ عمل پالیسی مرتب کی جائے۔