ایرانی سپریم لیڈر کے ہر حکم پر عمل کریں گے؛ حوثی کمانڈر کا دوٹوک اعلان

یمن کے حوثیوں نے اعلان کیا ہے کہ اگر یمن کے خلاف محاصرہ اور جارحیت کا سلسلہ بند نہ ہوا تو وہ ایرانی سپریم لیڈر آیت اللہ مجتبیٰ خامنہ ای کی جانب سے جاری ہونے والی ہر ہدایت پر عمل درآمد کے لیے مکمل طور پر تیار ہیں۔ یمن کی سرکاری خبر رساں ایجنسی ’سبا‘ کے مطابق، یہ بات حوثی فورسز کے وزیرِ دفاع میجر جنرل محمد العاطفی نے ایک انٹرویو میں کہی۔ انہوں نے واضح کیا کہ حوثی افواج کے پاس اپنے دفاع اور جوابی کارروائی کے لیے تمام ممکنہ آپشنز موجود ہیں اور جارح ممالک کو معلوم ہونا چاہیے کہ وہ ہر قسم کا ردِعمل دینے کی صلاحیت رکھتے ہیں۔ دوسری جانب، ایرانی سپریم لیڈر آیت اللہ مجتبیٰ خامنہ ای نے بھی اپنے حالیہ بیانات میں زور دیا ہے کہ ایران اور اس کے اتحادی کسی بھی بیرونی جارحیت کا بھرپور اور فیصلہ کن جواب دیں گے اور مزاحمتی محاذ کسی دباؤ یا دھمکی کے سامنے نہیں جھکے گا۔ ایرانی قیادت کا مؤقف ہے کہ خطے میں امریکی اور اسرائیلی کارروائیاں عدم استحکام کو بڑھا رہی ہیں، اور ایران اپنے اتحادیوں کی سیاسی و دفاعی حمایت جاری رکھے گا۔