حکومت بلوچستان اور دھرنا کمیٹی کے مذاکرات کامیاب، تحریری معاہدہ طے پا گیا

وزیر اعلیٰ بلوچستان سرفراز بگٹی کی مفاہمتی کوششوں کے نتیجے میں بلوچستان حکومت، شہدائے زیارت کے لواحقین اور دھرنا کمیٹی کے درمیان مذاکرات کامیاب ہو گئے ہیں۔ رکن دھرنا کمیٹی نصر اللہ زیرے کے مطابق، فریقین نے مذاکرات کے مسودے پر اتفاق رائے کے بعد معاہدے پر دستخط کر دیے ہیں۔ معاہدے کے تحت زیارت واقعے کی تحقیقات کے لیے جوڈیشل کمیشن بنانے پر اتفاق کیا گیا ہے، جبکہ وزیراعلیٰ بلوچستان کی زیر صدارت امن و امان پر ایک مشترکہ اجلاس بھی ہوگا جس میں اپوزیشن اور شہداء کے لواحقین شریک ہوں گے۔ متن کے مطابق شہدائے زیارت کو سرکاری پالیسی کے تحت شہید قرار دے کر لواحقین کو معاوضہ، کفالت اور بچوں کو تعلیم فراہم کی جائے گی، اور سرکاری عمارتیں ان کے ناموں سے منسوب ہوں گی۔ اس کے علاوہ، ریونیو سے متعلق عوامی تحفظات کے حل کے لیے وزیر ریونیو کی سربراہی میں کمیٹی قائم کی جائے گی۔ اس موقع پر سرفراز بگٹی کا کہنا تھا کہ شہداء کے اہلِ خانہ کی دیکھ بھال حکومت کی ذمہ داری ہے، جبکہ پاک فوج، ایف سی اور پولیس کی قربانیاں ناقابلِ فراموش ہیں۔