ایرانی فوجی صلاحیتیں کمزور کرنے کا مشن، امریکا کے مسلسل ساتویں رات ایران پر حملے

امریکی سینٹرل کمانڈ (سینٹ کام) نے ایران کے خلاف مسلسل ساتویں رات بھی فضائی حملوں کا نیا سلسلہ شروع کر دیا ہے۔ سماجی رابطے کی ویب سائٹ ’ایکس‘ پر جاری ایک بیان میں سینٹ کام نے تصدیق کی ہے کہ یہ حملے کمانڈر اِن چیف کی براہِ راست ہدایت پر کیے جا رہے ہیں، جن کا بنیادی مقصد ایرانی فوجی صلاحیتوں کو مزید کمزور کرنا ہے۔ واضح رہے کہ ایک حالیہ مفاہمتی یادداشت کے بعد دونوں ممالک کے درمیان حالات اچانک انتہائی کشیدہ ہو گئے ہیں اور امریکی فورسز مختلف ایرانی شہروں میں فوجی اہداف کے ساتھ ساتھ مبینہ طور پر شہری تنصیبات کو بھی نشانہ بنا رہی ہیں۔ دوسری جانب، ایرانی فورسز نے بھی جوابی کارروائیاں تیز کر دی ہیں، جس کے تحت ایران کی پاسدارانِ انقلاب نے قطر میں واقع امریکی “العدید ایئر بیس” پر حملے کا دعویٰ کیا ہے، جہاں ان کے مطابق امریکی اڈے کا ریڈار سسٹم اور فضائی ایندھن فراہم کرنے والے طیارے تباہ کر دیے گئے ہیں۔