خطے کے پانیوں میں امریکی فوج کی نقل و حرکت، انکے فوجی ساز و سامان پر نظر ہے: ایران

ایرانی پاسدارانِ انقلاب کی نیول کمان نے اعلان کیا ہے کہ بحریہ خطے کے پانیوں میں امریکی فوج کی نقل و حرکت اور ان کے فوجی ساز و سامان پر گہری نظر رکھے ہوئے ہے اور اب وہ وقت قریب پہنچ رہا ہے جب ایرانی مسلح افواج خطے میں امریکی سینٹ کام کے خلاف باقاعدہ آپریشن شروع کرنے والی ہیں۔ دوسری جانب، ایران کی پارلیمنٹ کی قومی سلامتی کمیٹی کے سربراہ ابراہیم عزیزی نے انکشاف کیا ہے کہ امریکا نے جنوبی ایران میں شہری تنصیبات کو نشانہ بنایا ہے، جن میں میناب کا ایک اسکول، اہواز میں بچوں کا کینسر اسپتال، اور لامرد کا اسپورٹس ہال اور رہائشی علاقے شامل ہیں۔ انہوں نے ان حملوں کو انسانی حقوق کے دعویداروں کے دوہرے معیار کا ثبوت قرار دیتے ہوئے کہا کہ دشمن جان لے ایرانی قوم کو شکست نہیں دی جا سکتی اور بے گناہ شہریوں کا خون کبھی رائیگاں نہیں جائے گا۔