ٹرمپ کی دنیا کے سب سے بڑے طیارہ بردار بحری جہاز پر ایرانی حملے کی تصدیق

امریکی صدر ڈونلڈ ٹرمپ نے انکشاف کیا ہے کہ ایران نے دنیا کے سب سے بڑے اور جدید ترین طیارہ بردار بحری جہاز یو ایس ایس جیرالڈ آر فورڈ (USS Gerald R. Ford) پر ایک انتہائی شدید اور منظم حملہ کیا ہے۔ صدر ٹرمپ کے مطابق، ایرانی افواج نے اس جہاز کو 17 مختلف زاویوں سے نشانہ بنایا۔ انہوں نے حملے کی شدت بیان کرتے ہوئے کہا کہ رات ایک بجے کے قریب صورتحال اتنی سنگین تھی کہ جہاز پر موجود عملہ جان بچانے کے لیے بھاگ رہا تھا، جبکہ ہر 32 سیکنڈ بعد جنگی طیارے دفاعی اڑان بھر رہے تھے۔

رپورٹس کے مطابق، حملے کے نتیجے میں لگنے والی آگ اور ہونے والے نقصان کے بعد ‘جیرالڈ فورڈ’ فی الوقت یونان کے جزیرے کریٹ (Crete) میں مرمت کے لیے لنگرانداز ہے۔ اس صورتحال کے پیشِ نظر امریکہ نے اپنی عسکری قوت میں اضافے کے لیے ایک اور بحری بیڑا یو ایس ایس جارج ایچ ڈبلیو بش (USS George H.W. Bush) نارفوک سے مشرقِ وسطیٰ کے لیے روانہ کر دیا ہے۔ یہ بیڑا خطے میں پہلے سے موجود یو ایس ایس ابراہم لنکن اور متاثرہ جیرالڈ فورڈ کے ساتھ شامل ہو جائے گا، جس سے خطے میں امریکی طیارہ بردار جہازوں کی تعداد تین ہو جائے گی۔

صدر ٹرمپ نے خبردار کیا ہے کہ اس تیسرے بیڑے کی آمد کا مقصد ایران کے خلاف جاری امریکی عسکری آپریشنز کو مزید تقویت دینا اور کسی بھی ممکنہ مہم جوئی کا منہ توڑ جواب دینا ہے۔ ماہرین کا کہنا ہے کہ امریکہ کی یہ غیر معمولی بحری نقل و حرکت 2003 کی عراق جنگ کے بعد خطے میں سب سے بڑا عسکری اجتماع ہے، جو کسی بڑے تصادم کی جانب اشارہ کر رہا ہے۔