استنبول سے اسلام آباد آنیوالی پرواز میں خرابی، باکو میں ایمرجنسی لینڈنگ

استنبول سے اسلام آباد آنے والی ایک غیر ملکی ایئرلائن کی پرواز کو آذربائیجان کی فضائی حدود میں شدید تکنیکی خرابی کا سامنا کرنا پڑا، جس کے بعد پائلٹ نے ایمرجنسی پیغام جاری کرتے ہوئے طیارے کو باکو ایئرپورٹ پر بحفاظت اتار لیا۔ فلائٹ ریڈار 24 کے مطابق، ایئربس اے 330 (Airbus A330) طیارے کا گلوبل نیوی گیشن سیٹلائٹ سسٹم سے سگنل کا رابطہ منقطع ہو گیا تھا، جس پر پائلٹ نے ایئر ٹریفک کنٹرول کی رہنمائی میں ہنگامی لینڈنگ کی۔ اس پرواز نے دوپہر 3:35 پر اسلام آباد پہنچنا تھا، تاہم حادثے کے بعد مسافروں کو باکو ٹرمینل منتقل کر کے طیارے کی مرمت کا کام شروع کیا گیا۔ ذرائع کے مطابق، طویل انتظار کے بعد مسافروں کو ساڑھے 8 گھنٹے کی تاخیر سے اسلام آباد پہنچا دیا گیا، جبکہ اس طیارے کی استنبول واپسی کی پرواز بھی پونے 9 گھنٹے لیٹ ہوئی۔