ان دہشت گردوں کے خلاف فیصلہ کن آپریشن ناگزیر ہو چکا ہے: سردار تنویر الیاس کا شرپسندوں کے حملے کے بعد ویڈیو پیغام

صدر آئی پی پی آزاد کشمیر اور سابق وزیراعظم سردار تنویر الیاس نے اپنے انتخابی قافلے پر ہونے والے حملے کے بعد ایک ویڈیو پیغام جاری کیا ہے، جس میں انہوں نے بتایا کہ وہ حلقہ ایل اے 22 پونچھ 5 میں اپنے آبائی گھر جا رہے تھے کہ یونین کونسل ٹائیں ڈھلکوٹ کے مقام پر ان پر قاتلانہ حملہ کیا گیا۔ سردار تنویر الیاس کے مطابق، اس حملے میں ان کے ساتھی اور سابق ایس ایس جی کمانڈو سردار محمد آصف انہیں بچاتے ہوئے جامِ شہادت نوش کر گئے جبکہ قافلے کے دیگر ارکان زخمی ہوئے۔ انہوں نے شدید برہمی کا اظہار کرتے ہوئے کہا کہ جو عناصر ریاست میں آٹے اور اشیائے خوردونوش کی قلت کا شور مچاتے ہیں، وہی خود راستے بند کر کے ریاستی نظام اور عام آدمی کی زندگی کو یرغمال بنائے ہوئے ہیں۔ انہوں نے واضح کیا کہ ہم نے معاملات کو افہام و تفہیم سے حل کرنے کی ہر ممکن کوشش کی مگر یہ دہشت گرد کسی رعایت کے مستحق نہیں اور ریاست کو لاقانونیت پھیلانے والوں سے آہنی ہاتھوں سے نمٹنا ہوگا۔