صدرآئی پی پی عبدالعلیم خان کی سردار تنویر الیاس کے انتخابی قافلے پر حملے کی سخت مذمت

استحکامِ پاکستان پارٹی (IPP) کے مرکزی صدر عبدالعلیم خان نے صدر استحکامِ پاکستان پارٹی آزاد کشمیر اور سابق وزیراعظم سردار تنویر الیاس کے انتخابی قافلے پر ہونے والے مسلح حملے کی شدید الفاظ میں مذمت کی ہے۔ انہوں نے آزاد کشمیر میں ٹائیں ڈلکوٹ کے مقام پر ایکشن کمیٹی کے مبینہ شرپسندوں کی فائرنگ سے سیکیورٹی گارڈ کی شہادت اور سابق مشیر سردار امتیاز شاہین سمیت دیگر افراد کے زخمی ہونے پر گہرے دکھ اور دلی افسوس کا اظہار کیا ہے۔ عبدالعلیم خان نے شرپسند عناصر کے اس اقدام کو انتہائی بزدلانہ قرار دیتے ہوئے واضح کیا کہ سیاست میں تشدد کی کوئی گنجائش نہیں ہو سکتی۔ انہوں نے مزید کہا کہ وہ اس تکلیف دہ گھڑی میں شہید سیکیورٹی گارڈ اور زخمیوں کے اہل خانہ کے ساتھ برابر کے شریک ہیں اور انہوں نے حکام سے ملزمان کو فوری گرفتار کر کے قانون کے کٹہرے میں لانے کا مطالبہ کیا ہے۔