اربوں ڈالر کی سرمایہ کاری سے پورٹ قاسم کی ترقی کا نیا دور شروع ہوگا: معظم الیاس

چیئرمین پورٹ قاسم اتھارٹی ریئر ایڈمرل (ر) سید معظم الیاس نے دنیا نیوز سے خصوصی گفتگو کرتے ہوئے بتایا ہے کہ یو اے ای، ترکیہ، قطر اور چین کی جانب سے پورٹ قاسم میں 30 سالہ منصوبے کے تحت تقریباً 2 ارب ڈالر کی نئی سرمایہ کاری متوقع ہے، جس سے ملکی بندرگاہی انفراسٹرکچر میں ترقی کا نیا دور شروع ہوگا۔ انہوں نے انکشاف کیا کہ ریکوڈک مائننگ کمپنی بھی پورٹ قاسم میں براہِ راست 15 کروڑ ڈالر کی سرمایہ کاری کرے گی اور معدنیات کی ترسیل کے لیے ریلوے ٹریک پر کام شروع کر دیا گیا ہے۔ مزید برآں، ایم ایل ون منصوبے کے تحت پپری سے پورٹ قاسم تک نئی ریلوے لائن تعمیر کی جا رہی ہے جو مستقبل میں تھر کے کوئلے کی ترسیل اور ملکی برآمدات کے لیے استعمال ہوگی۔ سید معظم الیاس کے مطابق، بندرگاہ پر 25 کروڑ ڈالر کی لاگت سے ڈریجنگ آپریشن کے پہلے مرحلے کا آغاز ہو چکا ہے، جس کی تکمیل کے بعد 18 میٹر گہرائی والے دنیا کے جدید اور انتہائی بڑے بحری جہاز بھی یہاں لنگر انداز ہو سکیں گے۔