امریکہ نے 85 پاکستانی طلبہ و محققین کو فل برائٹ اسکالرشپس سے نواز دیا

امریکی حکومت نے پاکستان کے 85 طلبہ اور محققین کو امریکہ کی مایہ ناز جامعات میں ماسٹرز اور پی ایچ ڈی کی اعلیٰ تعلیم کے لیے معتبر ‘فل برائٹ اسکالرشپس’ دینے کا اعلان کیا ہے۔ پاکستان میں یونائیٹڈ اسٹیٹس ایجوکیشنل فاؤنڈیشن (USEFP) کے زیرِ انتظام چلنے والے اس فلیگ شپ پروگرام کی مالی معاونت امریکہ اور پاکستان مشترکہ طور پر کرتے ہیں۔ رواں سال اس اسکالرشپ کے لیے 71 ماسٹرز اور 14 پی ایچ ڈی کے طلبہ کا انتخاب کیا گیا ہے جن کا تعلق پاکستان کے تمام صوبوں سے ہے، اور وہ انجینئرنگ، مصنوعی ذہانت (AI)، بزنس اور پبلک پالیسی جیسے اہم شعبوں میں تعلیم حاصل کریں گے۔ اس سلسلے میں اسلام آباد میں دو روزہ پری ڈیپارچر اورینٹیشن کا انعقاد بھی کیا گیا، جہاں امریکی ناظم الامور اینڈی ہالس نے خطاب کرتے ہوئے کہا کہ پاکستان دنیا کے سب سے بڑے فل برائٹ پروگرامز میں سے ایک کا میزبان ہے جو دونوں ممالک کے مضبوط تعلیمی اور سفارتی تعلقات کا ثبوت ہے۔ واضح رہے کہ ان اسکالرشپس میں ٹیوشن فیس، ماہانہ وظیفہ، ہوائی ٹکٹ اور ہیلتھ انشورنس مکمل طور پر شامل ہیں۔