کراچی؛ عالمی سطح پر نمایاں کامیابیاں حاصل کرنیوالے کھلاڑیوں کے اعزاز میں پروقار تقریب کا انعقاد

چیئرمین ٹاؤن میونسپل کارپوریشن (ٹی ایم سی) اورنگی، حاجی محمد جمیل ضیاء کی جانب سے مسٹر جونیئر یونیورس 2026 اطہر جہاں سمیت اورنگی ٹاؤن سے تعلق رکھنے والے عالمی سطح پر نمایاں کامیابیاں حاصل کرنے والے باڈی بلڈرز، باکسرز اور دیگر کھلاڑیوں کے اعزاز میں ایک پروقار استقبالیہ تقریب کا انعقاد کیا گیا۔

ترجمان سندھ پولیس اسپورٹس بورڈ کے مطابق، اس شاندار تقریب میں ڈی آئی جی ٹریفک کراچی و چیئرمین سندھ پولیس اسپورٹس بورڈ نے بطور مہمانِ خصوصی شرکت کی۔ تقریب میں سندھ پولیس کے اعلیٰ افسران، مختلف کھیلوں کے نامور کھلاڑیوں اور علاقے کی دیگر معزز شخصیات نے بھی بڑی تعداد میں شرکت کر کے کھلاڑیوں کی حوصلہ افزائی کی۔

اس موقع پر مہمانِ خصوصی ڈی آئی جی ٹریفک کراچی نے عالمی سطح پر پاکستان کا نام روشن کرنے والے کھلاڑیوں میں یادگاری شیلڈز تقسیم کیں۔ اپنے خطاب میں انہوں نے کہا کہ عالمی سطح پر اعزازات حاصل کرنے والے کھلاڑی پوری قوم کا فخر ہیں اور ان کی اس طرح پذیرائی کرنا نوجوان نسل کو کھیلوں کی مثبت سرگرمیوں کی جانب راغب کرنے میں اہم کردار ادا کرتا ہے۔

انہوں نے تقریب کے انعقاد پر چیئرمین ٹی ایم سی اورنگی حاجی محمد جمیل ضیاء کا خصوصی شکریہ ادا کرتے ہوئے کہا کہ ایسی تقریبات معاشرے میں صحت مند سرگرمیوں، قومی جذبے اور نوجوانوں میں مثبت سوچ کے فروغ کا مؤثر ذریعہ ہیں۔ انہوں نے واضح کیا کہ سندھ پولیس اسپورٹس بورڈ کے ذریعے مختلف کھیلوں کی سرپرستی کا سلسلہ جاری رکھے ہوئے ہے اور مستقبل میں بھی قومی و بین الاقوامی سطح پر ملک کا نام روشن کرنے والے باصلاحیت کھلاڑیوں کی ہر ممکن حوصلہ افزائی اور سرپرستی جاری رکھی جائے گی۔