طالبان رجیم کا بدترین اقتدار، خواتین کے بعد اب نوجوانوں کا بھی مستقبل تاریک

افغانستان میں خواتین پر تعلیم اور روزگار کے دروازے بند کرنے کے بعد اب طالبان حکومت نے نوجوانوں کو بھی ان کے بنیادی حقِ تعلیم سے محروم کرنا شروع کر دیا ہے۔ عالمی جریدے ’دی گارڈین‘ کی ایک رپورٹ کے مطابق، اقوامِ متحدہ کے ادارہ برائے تعلیم، سائنس و ثقافت (یونیسکو) نے انکشاف کیا ہے کہ طالبان کے برسرِاقتدار آنے کے بعد ملک میں اعلیٰ تعلیم حاصل کرنے والے طلبہ کی تعداد میں شدید ترین کمی واقع ہوئی ہے، جس نے افغان نوجوانوں کے مستقبل کو داؤ پر لگا دیا ہے۔

اقوامِ متحدہ میں انسانی حقوق کے سربراہ وولکر ترک نے اس تشویشناک صورتحال پر ردعمل دیتے ہوئے کہا ہے کہ طالبان رجیم نے لاکھوں افغان شہریوں کو بنیادی حقوق سے محروم کر کے انسانی حقوق کی سنگین ترین خلاف ورزی کی ہے۔ انہوں نے عالمی برادری کی خاموشی پر افسوس کا اظہار کرتے ہوئے کہا کہ جہاں خواتین کی تعلیم پر بات کی جاتی ہے، وہیں افغان طالبان کے زیرِ تسلط پڑھنے والے نوجوان طلبہ کی اس بدترین اور مظلومانہ حالت پر کسی بھی بڑے عالمی فورم پر مؤثر طریقے سے آواز نہیں اٹھائی جا رہی۔  مقامی افغان طلبہ کا کہنا ہے کہ یونیورسٹیوں میں طالبان کے سخت قوانین نافذ ہیں، جہاں داڑھی نہ رکھنے یا لباس کے ضوابط کی معمولی خلاف ورزی پر بھی طلبہ کو وحشیانہ تشدد کا نشانہ بنایا جاتا ہے۔ اس کے ساتھ ہی، تعلیمی شعبے کے انتہائی تجربہ کار اور قابل پروفیسرز کے ملک چھوڑ جانے سے افغانستان کی اعلیٰ جامعات کا تعلیمی معیار تباہ ہو کر رہ گیا ہے۔

ماہرینِ تعلیم اور تجزیہ کاروں کے مطابق، طالبان کا بنیادی مقصد تعلیمی اداروں کو مکمل طور پر مفلوج کر کے نئی نسل کو فکری اور تعلیمی طور پر تباہ کرنا ہے۔ اس سلسلے میں بھارتی صحافی دھرم جوت نے تبصرہ کرتے ہوئے کہا کہ روزگار اور تعلیم پر عائد کڑی پابندیاں افغان عوام کے بنیادی حقوق کا بدترین استحصال ہیں اور افغانستان پر مسلط موجودہ طالبان رجیم عالمی سطح پر انسانی حقوق پامال کرنے کی بدترین مثال بن چکی ہے