مکہ مشترکہ دفاعی معاہدہ خطے کے کسی ملک کیلئے خطرہ نہیں: سعودی عہدیدار

سعودی وزارتِ خارجہ کے نائب وزیر ایمبیسیڈر ڈاکٹر رائد قرملی نے اپنے ایک اہم بیان میں واضح کیا ہے کہ سعودی عرب، ترکیہ اور پاکستان کے درمیان طے پانے والا تاریخی ‘مکہ مشترکہ دفاعی معاہدہ’ تینوں ممالک کے کئی دہائیوں پر محیط گہرے اسٹریٹجک، تاریخی اور اخوی تعلقات کا عکاس ہے۔ انہوں نے بتایا کہ یہ جامع معاہدہ اچانک نہیں بلکہ کئی برسوں پر محیط طویل اور تفصیلی مذاکراتی عمل کے بعد حتمی شکل میں سامنے آیا ہے۔ سوشل میڈیا پلیٹ فارم ‘ایکس’ (X) پر جاری کردہ ایک پوسٹ میں انہوں نے کہا کہ اس معاہدے کا بنیادی مقصد بانی ممالک کی مشترکہ دفاعی صلاحیتوں کو باہم مضبوط بنانا، دفاعی تیاریوں کو جدید خطوط پر استوار کرنا اور ان کی سلامتی و علاقائی سالمیت کو درپیش کسی بھی خارجی خطرے سے نمٹنے کے لیے تعاون کو فروغ دینا ہے۔

ڈاکٹر رائد قرملی نے وضاحت کرتے ہوئے ان خدشات کو رد کیا کہ یہ معاہدہ کسی فوجی یا مسلکی اتحاد کی تشکیل کے لیے ہے۔ انہوں نے زور دے کر کہا کہ اس پیش رفت کا تعلق کسی قسم کے جوہری عزائم یا خطے میں اسلحے کی دوڑ سے ہرگز نہیں، بلکہ اس کا حقیقی مقصد پائیدار بنیادوں پر خود انحصار دفاعی صلاحیتوں کو ترقی دینا ہے۔ انہوں نے مزید یقین دہانی کرائی کہ یہ معاہدہ خلیجی، عرب اور بین الاقوامی سطح پر سعودی عرب کے موجودہ مضبوط تعلقات اور معاہدوں کی قیمت پر نہیں کیا گیا، اور نہ ہی یہ خطے کے کسی بھی ملک کی سلامتی کے لیے خطرہ ہے یا دو ممالک کے مابین کشیدگی میں اضافے کا موجب بنے گا۔