آئی ایس پی آر سمر انٹرن شپ پروگرام، ڈاکٹر معید یوسف کی طلبہ کیساتھ خصوصی نشست

پاک فوج کے شعبہ تعلقاتِ عامہ (آئی ایس پی آر) کے زیرِ اہتمام ‘سمر انٹرن شپ پروگرام 2026ء’ کامیابی کے ساتھ جاری ہے، جس میں پاکستان بھر کے 21 مختلف اسٹیشنز پر 6150 سے زائد طلبا و طالبات شرکت کر رہے ہیں۔ اس پروگرام کے سلسلے میں سابق مشیرِ قومی سلامتی ڈاکٹر معید یوسف نے انٹرنشپ میں شریک طلبہ کے ساتھ ایک خصوصی نشست میں شرکت کی، جس میں انہوں نے قومی سلامتی، ملکی معیشت اور تعمیرِ ملت میں نوجوانوں کے کلیدی کردار پر تفصیلی اظہارِ خیال کیا۔

نشست سے خطاب کرتے ہوئے ڈاکٹر معید یوسف نے کہا کہ دنیا کے تمام ترقی یافتہ معاشروں میں سب سے مشترکہ اور اہم عنصر ان کی نوجوان نسل کا مثبت کردار، بلند حوصلہ اور قومی دھارے میں مؤثر شمولیت ہے۔ انہوں نے وضاحت کی کہ جامع قومی سلامتی کا حقیقی تصور صرف سرحدوں کی حفاظت تک محدود نہیں بلکہ ہر شہری کا تحفظ، عزت، سلامتی اور معاشی خوشحالی کو یقینی بنانے سے وابستہ ہے۔ ان کا کہنا تھا کہ پاکستان کا روشن اور مستحکم مستقبل یہاں کے نوجوانوں کی جدید سوچ، قابلیت، محنت اور بلند عزم سے ہی ممکن ہے۔ تقریب کے اختتام پر ڈاکٹر معید یوسف نے طلبا و طالبات کے سوالات کے تفصیلی اور مدلل جوابات بھی دیے، جبکہ شرکا نے اس پروگرام کو طلبہ کی فکری و علمی تربیت کے لیے بہترین اقدام قرار دیا۔