مریم نواز سے ایم پی ایز کی ملاقات، سیاسی امور، عوامی فلاحی منصوبوں پر تبادلہ خیال

وزیراعلیٰ پنجاب مریم نواز شریف سے ضلع وہاڑی سے تعلق رکھنے والے ارکانِ صوبائی اسمبلی نے ملاقات کی، جس میں علاقے میں جاری ترقیاتی اسکیموں، سیاسی امور اور عوامی فلاحی منصوبوں کا تفصیلی جائزہ لیا گیا۔

ملاقات کرنے والے ارکانِ اسمبلی میں محمد یوسف کسیلہ، ملک نوشیر انجم لنگڑیال، میاں محمد ثاقب خورشید اور محمد نعیم اختر خان بھابھہ شامل تھے۔ ارکانِ اسمبلی نے پانچ دہائیوں سے خستہ حال اور سنگل روڈ وہاڑی ملتان روڈ کو شاندار دو رویہ ایکسپریس وے میں تبدیل کرنے پر وزیراعلیٰ مریم نواز کا شکریہ ادا کیا اور اسے خطے کا گیم چینجر پروجیکٹ قرار دیا۔ اس کے علاوہ وہاڑی، بورے والا اور ٹبہ سلطان پور میں الیکٹرک بس سروس کے آغاز بالخصوص طلبہ، خواتین اور بزرگوں کے لیے مفت سفر کی سہولت فراہم کرنے پر حکومت کے اقدام کو سراہا۔

وزیراعلیٰ پنجاب مریم نواز شریف نے گفتگو کرتے ہوئے کہا کہ عوام کی خدمت کا جذبہ انہیں اپنے قائد محمد نواز شریف سے ورثے میں ملا ہے۔ پنجاب ڈویلپمنٹ پروگرام کے ذریعے صوبے کے تمام اضلاع میں یکساں ترقی کا کلچر متعارف کرایا گیا ہے۔ انہوں نے کہا کہ کسان کارڈ، ہونہار اسکالرشپ، لیپ ٹاپ اسکیماں اور مون سون کے لیے نکاسیٔ آب کے جدید سسٹمز کے ذریعے جنوبی پنجاب سمیت پورے صوبے کے عوام کو ریلیف فراہم کیا جا رہا ہے۔