محسن نقوی کا لاہور ایئرپورٹ کا دورہ، امیگریشن کے عمل کا جائزہ لیا

وفاقی وزیرِ داخلہ محسن نقوی نے علامہ اقبال انٹرنیشنل ایئرپورٹ لاہور کا اچانک دورہ کیا اور مسافروں کی روانگی و آمد کے لیے قائم امیگریشن پراسیس کا باریک بینی سے جائزہ لیا۔ دورے کے دوران انہوں نے امیگریشن کاؤنٹرز کا معائنہ کیا، عملے سے مراحل کی تفصیلات دریافت کیں اور وہاں موجود مسافروں سے ان کو درپیش وقت اور مسائل کے بارے میں براہِ راست بات چیت کی۔ مسافروں کی جانب سے امیگریشن عمل میں 30 منٹ سے زائد وقت لگنے اور تاخیر کی شکایت پر وزیرِ داخلہ نے فوری ایکشن لیتے ہوئے ایئرپورٹ انتظامیہ کو تمام کاؤنٹرز اوپن رکھنے کی سخت ہدایت جاری کی تاکہ امیگریشن کا عمل تیز تر ہو سکے اور شہریوں کی بلاوجہ خواری ختم ہو۔

دورے کے دوران ایک مسافر نے وزیرِ داخلہ سے ایجنٹ کی جانب سے رقم بٹورنے کی شکایت کی، جس پر محسن نقوی نے موقع پر ہی نوٹس لیتے ہوئے معاملہ ڈائریکٹر ایف آئی اے کے سپرد کر دیا اور ملوث ایجنٹ کی فوری گرفتاری کے احکامات جاری کیے۔ وفاقی وزیرِ داخلہ نے ایف آئی اے حکام کو واضح ہدایات جاری کیں کہ نامکمل یا جعلی سفری دستاویزات پر کسی بھی شخص کو بیرونِ ملک جانے کی اجازت نہ دی جائے، تاہم مکمل اور درست دستاویزات کے حامل عام مسافروں کو کسی صورت نہ روکا جائے اور انہیں تمام تر سہولیات فراہم کی جائیں۔