افغان حکومت اپنی سرزمین پاکستان میں دہشتگردی کیلئے استعمال نہ ہونے دے، حافظ نعیم

امیر جماعت اسلامی پاکستان حافظ نعیم الرحمن نے کہا ہے کہ افغان حکومت بات چیت کے ذریعے مسائل کا حل نکالے اور اپنی سرزمین پاکستان کے خلاف دہشت گردی کے لیے استعمال نہ ہونے دے۔

پشاور میں میڈیا سے گفتگو کرتے ہوئے حافظ نعیم الرحمن نے مکہ میں ہونے والے سہ فریقی دفاعی معاہدے کا خیر مقدم کرتے ہوئے کہا کہ یہ امت مسلمہ کے اتحاد کی جانب پہلا مثبت قدم ہے اور اس معاہدے میں ایران کو بھی جلد شامل کیا جانا چاہیے۔ انہوں نے کہا کہ دہشت گردی کو روکنے کے لیے روزگار کی فراہمی اور انڈسٹریز کا قیام ضروری ہے، حکومت کو چاہیے کہ افغان حکومت کے ساتھ ٹھوس ثبوتوں کی بنیاد پر بات چیت کر کے حالات میں بہتری لائے۔

امیر جماعت اسلامی نے ملک میں پٹرولیم مصنوعات کی بڑھتی ہوئی قیمتوں اور بجلی کے بھاری بلوں پر شدید تنقید کرتے ہوئے مطالبات پیش کیے:حکومت عوام سے پٹرولیم لیوی کی مد میں 8 ہزار ارب روپے سے زائد وصول کر چکی ہے جس سے اپنے اخراجات اور کرپشن کو چھپایا جاتا ہے۔ پٹرول اور ڈیزل کی قیمت 225 روپے فی لیٹر مقرر کی جائے اور تمام پٹرولیم لیوی فی الفور ختم کی جائے۔ فارم 47 کی حکومت کی مہنگائی اور عوام دشمن پالیسیوں کے خلاف اگست میں چاروں صوبوں میں بیک وقت دھرنے دیے جائیں گے۔انہوں نے تمام اپوزیشن جماعتوں اور عوام سے جماعت اسلامی کے احتجاجی تحریک اور دھرنوں میں ساتھ دینے کی اپیل کی تاکہ عوامی مفاد کی جنگ جیتی جا سکے۔