کوسوو میں اپوزیشن رکن اسمبلی نے قائم مقام وزیراعظم پر انڈے پھینک دیے

کوسوو کی پارلیمنٹ کے اجلاس کے دوران اپوزیشن جماعت سے تعلق رکھنے والی رکنِ پارلیمنٹ نے قائم مقام وزیراعظم البین کُرتی (Albin Kurti) پر انڈے پھینک دیے۔ غیر ملکی میڈیا رپورٹس کے مطابق ‘الائنس پارٹی’ کی خاتون رکنِ پارلیمنٹ ٹائم کادریجاج (Time Kadrijaj) نے ایوان کے اندر قائم مقام وزیراعظم کی جانب ایک کے بعد ایک چار انڈے پھینکے اور ان کے خلاف ‘شیم شیم’ کے نعرے لگائے۔

یہ ہنگامہ آرائی اس وقت پیش آئی جب قائم مقام وزیراعظم البین کُرتی نے ایوان میں اسپیکر کا انتخاب عمل میں لانے کے لیے مزید وقت مانگا۔ یاد رہے کہ جون میں ہونے والے عام انتخابات کے بعد سے کوسوو کی پارلیمنٹ تاحال نیا اسپیکر منتخب کرنے میں ناکام رہی ہے۔ اپوزیشن جماعتوں کا موقف تھا کہ آئینی عدالت کی جانب سے اسپیکر کے انتخاب کے لیے دی گئی حتمی ڈیڈ لائن پہلے ہی ختم ہو چکی ہے، جس کے بعد پارلیمنٹ کے اس سیشن کی انعقاد کی کوئی قانون اور آئینی حیثیت نہیں بچتی۔