ترکش پیٹرولیم پاکستان کے سمندروں میں آف شور ڈرلنگ کرنے جا رہی ہے: علی پرویز

وفاقی وزیر برائے پیٹرولیم علی پرویز ملک نے اعلان کیا ہے کہ ترکش پیٹرولیم (Turkish Petroleum) پاکستان کے سمندروں میں آف شور ڈرلنگ (Offshore Drilling) کا آغاز کرنے جا رہی ہے، جس کے بعد ملک میں ایک بڑی غیر ملکی سرمایہ کاری آئے گی۔ لاہور میں ایک تقریب سے خطاب کرتے ہوئے انہوں نے کہا کہ مسلم لیگ (ن) عملی سیاست پر یقین رکھتی ہے اور قائد نواز شریف نے ملک کو ایٹمی قوت بنا کر ناقابل تسخیر بنایا۔ وفاقی وزیر نے کہا کہ ایران امریکا کشیدگی کے دوران پاکستان خطے میں امن اور تحفظ کا ضامن بن کر سامنے آیا ہے، اور مکہ میں ہونے والے معاہدے پر پوری قوم کو فخر ہے جس میں سعودیہ کی معاشی قوت، ترکیے کی ترقی اور پاکستان کی دفاعی صلاحیت اہم کردار ادا کرے گی۔

انہوں نے مزید کہا کہ افواجِ پاکستان کی صلاحیتوں اور مہارت کا اعتراف پوری دنیا کر رہی ہے۔ ایران اور امریکا کے درمیان کشیدگی سے پیدا ہونے والے معاشی چیلنجز کے باوجود وزیراعظم شہباز شریف نے مشکل و بروقت فیصلے کر کے ملک کو ترقی کی راہ پر گامزن کیا ہے، اور اب اگلی منزل معاشی میدان میں کامیابی حاصل کرنا ہے۔ وزیر پیٹرولیم کا کہنا تھا کہ محدود وسائل کے باوجود حکومت نے عوام کو ریلیف دینے اور تیل کی قیمتوں کو کنٹرول میں رکھنے کی بھرپور کوشش کی ہے۔ پٹرول اگرچہ مہنگا ہے لیکن حکومت نے ملک میں ایندھن کی قلت بالکل پیدا نہیں ہونے دی، جبکہ پڑوسی ممالک میں شناختی کارڈز پر محض دو لیٹر پٹرول دیا جا رہا ہے۔