عمران خان سے ملاقاتوں کا کیس: عدالت کا جیل انتظامیہ سے ریکارڈ پیش کرنے کا حکم

سپریم کورٹ آف پاکستان نے بانی پی ٹی آئی عمران خان کی اڈیالہ جیل میں ملاقاتوں سے متعلق کیس کی سماعت کے دوران جیل انتظامیہ سے ملاقاتوں کا مکمل ریکارڈ اور تفصیلی جامع رپورٹ 3 ہفتوں کے اندر طلب کر لی ہے۔ جسٹس محمد علی مظہر کی سربراہی میں قائم 3 رکنی بینچ نے کیس کی سماعت کی۔ دورانِ سماعت پنجاب حکومت کی جانب سے درخواستوں کے قابلِ سماعت ہونے پر اعتراض اٹھایا گیا، تاہم جسٹس محمد علی مظہر نے ریمارکس دیے کہ عدالت کو اگلی سماعت پر واضح طور پر بتایا جائے کہ جیل میں اب تک کتنی ملاقاتیں ہوئیں، کب ہوئیں اور کن کن افراد نے ملاقات کی ہے۔ عدالت عظمیٰ نے جیل کے باہر میڈیا ٹاک نہ کرنے سے متعلق اسلام آباد ہائیکورٹ کو دی گئی یقین دہانی کا ذکر کرتے ہوئے اس کی پاسداری پر بھی سوالات اٹھائے۔ بعد ازاں سپریم کورٹ نے ایڈووکیٹ جنرل کی استدعا پر رپورٹ جمع کرانے کے لیے 3 ہفتوں کی مہلت دیتے ہوئے سماعت ملتوی کر دی۔