سپارکو نے پاکستان کی پہلی چاند گاڑی کے نام کا اعلان کر دیا، قمری روور کا نام ‘جناح-1’ مقرر

پاکستان کے قومی خلائی ادارے سپارکو (SUPARCO) نے ملک کے پہلے قمری روور (چاند گاڑی) کے سرکاری نام کا باضابطہ اعلان کرتے ہوئے اسے ’’جناح-1‘‘ کا نام دیا ہے۔ ترجمان سپارکو کے مطابق اس نام کا انتخاب ملک گیر مقابلے میں موصول ہونے والی 4 ہزار سے زائد تجاویز میں سے کیا گیا۔ کل 7 شرکاء نے ‘جناح-1’ نام تجویز کیا تھا، جس کے بعد قرعہ اندازی کے ذریعے بہاول نگر سے تعلق رکھنے والے 17 سالہ طیب کریم کو مقابلے کا فاتح قرار دیا گیا۔

چیئرمین سپارکو نے بتایا کہ ‘جناح-1’ کا نام بانیِ پاکستان قائدِ اعظم محمد علی جناح کو خراجِ عقیدت پیش کرنے کے ساتھ ساتھ ملک کے عزم، ترقی اور نئے خلائی افق کا عکاس ہے۔ پاکستان کا یہ پہلا قمری روور 2029ء میں چین کے ’چانگ ای 8‘ (Chang’e 8) مشن کے ذریعے چاند پر بھیجا جائے گا۔ یہ روور چاند کے جنوبی قطب (South Pole) پر اتر کر سطحی جغرافیہ، پلازما اور تابکاری کا سائنسی مطالعہ کرے گا، جو مستقبل میں چاند پر انسانی موجودگی اور قمری تحقیق کے حوالے سے اہم پیش رفت ثابت ہو گا۔