دبئی سے اسرائیل جانے والی پرواز کی سعودی عرب میں ہنگامی لینڈنگ

دبئی سے اسرائیل جانے والی فلائی دبئی کی ایک پرواز کے دوران کاک پٹ میں پائلٹوں کے درمیان لڑائی کا انوکھا اور خطرناک واقعہ سامنے آیا ہے، جس کے بعد طیارے کو سعودی عرب کے ہوائی اڈے پر ہنگامی طور پر اتارنا پڑا۔

فلائٹ ٹریکنگ کے مطابق، دبئی سے تل ابیب جانے والی فلائی دبئی کی پرواز FZ1073 نے پرواز کے دوران پہلے ایمرجنسی کوڈ 7700 اور پھر انتہائی مختصر وقت کے لیے ہائی جیکنگ سے متعلق حساس کوڈ 7500 جاری کیا۔ اس ہنگامی صورتحال کے پیش نظر پرواز کا رخ اردن کی فضائی حدود سے موڑ کر سعودی عرب کی جانب کیا گیا، جہاں جنگی و فوجی طیاروں نے اسے اپنے گھیرے میں لے کر بحفاظت سعودی عرب کے تبوک ایئرپورٹ پر لینڈ کروا لیا۔ واضح رہے کہ اس طیارے میں 150 سے زائد اسرائیلی مسافر سوار تھے۔

واقعے کے بعد ترجمان اسرائیلی وزیراعظم کا کہنا ہے کہ دبئی سے تل ابیب جانے والی پرواز کا یہ واقعہ کسی بھی طرح کی ہائی جیکنگ نہیں تھا۔ دریں اثنا، اسرائیلی میڈیا نے ابتدائی اطلاعات کی روشنی میں بتایا کہ ہنگامی سگنل دراصل کاک پٹ میں پائلٹس کے باہمی جھگڑے کے دوران نادانستہ یا غصے میں فعال ہو گیا تھا۔

حکام کی جانب سے اس واقعے کے بعد طیارے کے عملے سے تفصیلی پوچھ گچھ کی جا رہی ہے اور معاملے کی مزید تحقیقات جاری ہیں تاکہ یہ حتمی طور پر واضح ہو سکے کہ دورانِ پرواز پائلٹوں کے درمیان تنازع کی کیا نوعیت تھی اور ہنگامی کوڈز کے فعال ہونے کی اصل وجوہات کیا تھیں۔