ٹیکس چوری پکڑنے کیلئے آرٹیفیشل انٹیلی جنس سے مدد لینے کا فیصلہ

فیڈرل بورڈ آف ریونیو (ایف بی آر) نے ملک میں ٹیکس چوری کی روک تھام اور شفافیت کے فروغ کے لیے مصنوعی ذہانت (اے آئی) پر مبنی جديد آڈٹ پلان تیار کر لیا ہے۔ ایف بی آر کے ترجمان کے مطابق، اس نئے اور خود کار آڈٹ نظام کی مدد سے انکم ٹیکس گوشواروں میں فراہم کردہ غلط یا مشکوک معلومات کی فوری نشاندہی کی جا سکے گی۔ اس ٹیکنالوجی کے ذریعے مالیاتی ڈیٹا اور لین دین کا باریک بینی سے جائزہ لیا جائے گا، اور ریٹرنز میں غلط معلومات جمع کرانے والوں کے خلاف قانون کے مطابق سخت قانونی کارروائی عمل میں لائی جائے گی۔

ایف بی آر نے تمام ٹیکس دہندگان کو ہدایت کی ہے کہ وہ اپنے تمام مالی لین دین کا ریکارڈ مکمل احتیاط سے مرتب کریں اور انکم ٹیکس ریٹرن فائل کرتے وقت تمام فراہم کردہ معلومات کا درست اور مستند دستاویزی ثبوت ساتھ رکھیں۔ ایف بی آر نے تمام متعلقہ افراد کو یاد دہانی کروائی ہے کہ انکم ٹیکس گوشوارے جمع کرانے کی آخری تاریخ 30 ستمبر ہے، اس لیے تمام ٹیکس دہندگان بلا تاخیر اور مکمل درستگی کے ساتھ اپنے گوشوارے جمع کروائیں تاکہ کسی بھی قسم کے آڈٹ یا قانونی کارروائی سے بچا جا سکے۔