9مئی مقدمہ: نامزد ملزم کا نام پی سی ایل سے نکالنے کی درخواست خارج

لاہور ہائیکورٹ نے 9 مئی کے پرتشدد واقعات کے ایک مقدمے میں نامزد ملزم کا نام پاسپورٹ کنٹرول لسٹ (PCL) سے خارج کرنے کی درخواست مسترد کرتے ہوئے ایک تفصیلی فیصلہ جاری کر دیا ہے۔

جسٹس منور اقبال ڈوگر نے اس درخواست پر 6 صفحات پر مشتمل تحریری فیصلہ جاری کیا، جس میں واضح کیا گیا کہ انسداد دہشت گردی ایکٹ (ATA) کے تحت چالان شدہ ملزم کا پاسپورٹ قانون کی رو سے ضبط شدہ تصور ہوتا ہے۔ عدالت نے قرار دیا کہ پاسپورٹ کی ضبطی ختم کرنے اور ملزم کو بیرونِ ملک سفر کی مشروط اجازت دینے کا مکمل اور باضابطہ اختیار صرف متعلقہ انسداد دہشت گردی (ATC) عدالت کے پاس ہے۔ فیصلے میں مزید کہا گیا ہے کہ محض ضمانت منظور ہونے سے کسی ملزم کو پاسپورٹ استعمال کرنے یا ملک سے باہر جانے کی خودکار اجازت نہیں مل جاتی، بلکہ اس کے لیے اسے ٹرائل کورٹ سے ہی رجوع کرنا ہوگا۔

ہائیکورٹ کے فیصلے کے مطابق پاسپورٹ کنٹرول یا اسٹاپ لسٹ سے کسی شخص کا نام نکالنے سے قانونی طور پر ضبط شدہ پاسپورٹ کی حیثیت خود بخود ختم نہیں ہو جاتی۔ عدالت نے اس بات پر بھی زور دیا کہ ہائیکورٹ اپنے آئینی دائرہ اختیار کو استعمال کرتے ہوئے براہِ راست ٹرائل کورٹ کے دائرہ اختیار میں مداخلت نہیں کر سکتی، اور کسی بھی انتظامی حکم کے ذریعے پارلیمنٹ کے بنائے گئے قانون کو غیر مؤثر نہیں بنایا جا سکتا۔ عدالت نے ‘فیڈریشن بنام شیخ رشید احمد’ کے ڈویژن بینچ کے فیصلے کی نظیر کو برقرار رکھتے ہوئے ایف آئی اے اور امیگریشن حکام کی جانب سے کیے گئے اقدامات کو قانونی قرار دیا۔

واضح رہے کہ درخواست گزار کے خلاف تھانہ سرور روڈ میں 9 مئی کے واقعات کا مقدمہ درج ہے (ایف آئی آر نمبر 96/23)۔ سماعت کے دوران پنجاب حکومت کی نمائندگی کرتے ہوئے اسسٹنٹ ایڈووکیٹ جنرل محمد عثمان خان نے ملزم کا نام پی سی ایل سے نکالنے کی شدید مخالفت کی تھی، اور فریقین کے دلائل مکمل ہونے کے بعد عدالت نے یہ فیصلہ سناتے ہوئے درخواست خارج کر دی۔