امریکی سینیٹر برنی سینڈرز کا اسرائیل کو فوجی امداد بند کرنے کا مطالبہ

امریکی سینیٹر برنی سینڈرز نے ٹرمپ انتظامیہ سے پرزور مطالبہ کیا ہے کہ اسرائیل کو دی جانے والی عسکری و فوجی امداد کو فوری طور پر بند کیا جائے۔

سماجی رابطے کی ویب سائٹ ‘ایکس’ پر اپنے ایک بیان میں برنی سینڈرز نے کہا کہ عام امریکی عوام اور کانگریس کے قانون ساز اب کھل کر اسرائیل کو فراہم کی جانے والی فوجی امداد ختم کرنے کا مطالبہ کر رہے ہیں، اور سینیٹ میں اس حوالے سے ہونے والی حالیہ ووٹنگ اس بدلتے ہوئے سیاسی رجحان کا سب سے بڑا ثبوت ہے۔

سینیٹر سینڈرز نے اعداد و شمار کا حوالہ دیتے ہوئے بتایا کہ جنوری 2024 میں جب انہوں نے غزہ میں انسانی حقوق کی مبینہ خلاف ورزیوں کی تحقیقات کے لیے ووٹنگ کرائی تھی، تو اس وقت صرف 11 سینیٹرز نے ان کی حمایت کی تھی؛ تاہم اب صورتحال یہ ہے کہ اسرائیل کے اقدامات کی تحقیقات سے متعلق تازہ قرارداد کے حق میں 47 سینیٹرز نے ووٹ دیا ہے۔ انہوں نے امریکی قیادت پر زور دیا کہ وہ اپنے عوام کی آواز سنے اور انسانی حقوق کے پیشِ نظر اسرائیل کو مزید کوئی فوجی امداد فراہم نہ کی جائے۔