سابق آسٹریلوی کرکٹر اسٹیورٹ میکگل کی ضمانت کی اپیل مسترد

سابق آسٹریلوی لیگ اسپنر اسٹیورٹ میکگل کو منشیات کے مقدمے میں بڑا جھٹکا لگا ہے جہاں عدالت نے ان کی ضمانت اور سزا کے خلاف دائر اپیل کو مسترد کر دیا ہے۔

آسٹریلوی میڈیا کی رپورٹس کے مطابق، سابق کرکٹر کو سال 2025 میں ایک ڈرگ ڈیل میں رقم کے لین دین (منی لانڈرنگ/پیسوں کی منتقلی) کے معاملے پر مجرم قرار دیتے ہوئے سزا سنائی گئی تھی۔ عدالت نے انہیں ایک سال 10 ماہ قید کے ساتھ ساتھ 495 روز کمیونٹی ورک (سماجی خدمات) کی سزا کا حکم دیا تھا۔

اس سزا کے خلاف سابق لیگ اسپنر نے نیو ساؤتھ ویلز کورٹ آف کرمنل اپیل میں درخواست دائر کی تھی، جسے عدالت نے دلائل سننے کے بعد خارج کر دیا۔ دوسری جانب اسٹیورٹ میکگل اپنے اوپر لگے الزامات کی تردید کرتے آئے ہیں اور ان کا دعویٰ ہے کہ وہ بے قصور ہیں اور انہیں اس ڈرگ ڈیل کے بارے میں کوئی علم نہیں تھا۔

یاد رہے کہ 55 سالہ اسٹیورٹ میکگل نے 1998 سے 2008 کے دوران آسٹریلیا کی جانب سے 44 ٹیسٹ میچز کھیلے، جس میں انہوں نے شین وارن کی موجودگی کے باوجود اپنی شاندار لیگ اسپنر باؤلنگ کی بدولت 208 وکٹیں حاصل کیں۔ تاہم، کرکٹ سے ریٹائرمنٹ کے بعد وہ مختلف تنازعات کا شکار رہے ہیں۔