اسرائیل کی جنوبی لبنان میں مسلسل بمباری، 90 ہزار گھر تباہ، 6 لاکھ افراد واپسی کے منتظر

جنوبی لبنان پر اسرائیل کی مسلسل اور وحشیانہ بمباری نے بڑے پیمانے پر انسانی اور مادی تباہی مچا دی ہے۔ تازہ ترین رپورٹس کے مطابق اسرائیلی حملوں کے باعث اب تک 90 ہزار سے زائد رہائشی مکانات زمین بوس یا شدید متاثر ہو چکے ہیں، جبکہ مسلسل جنگی صورتحال کی وجہ سے 6 لاکھ سے زیادہ افراد اپنے گھروں کو واپس لوٹنے سے قاصر ہیں۔

حیران کن طور پر اسرائیلی فوج کی جانب سے خود ایسی ویڈیوز بھی جاری کی جا رہی ہیں جن میں لبنانی شہریوں کے رہائشی گھروں کو بارود کی مدد سے دھماکوں سے اڑاتے ہوئے دکھایا گیا ہے، جس کے نتیجے میں کئی سرحدی دیہات اب ملبے کا ڈھیر بن چکے ہیں۔

لبنانی حکومت کے ابتدائی سروے کے مطابق، اسرائیلی جارحیت سے متاثرہ ان علاقوں کی دوبارہ تعمیرِ نو اور بحالی پر کم و بیش ایک ارب ڈالر سے زائد کی بھاری لاگت آئے گی، جبکہ جنگ سے متاثرہ مقامی آبادی کے پاس اس بڑے پیمانے پر بحالی کے کاموں کے لیے کوئی مالی وسائل موجود نہیں ہیں۔ دوسری جانب، جو چند شہری اپنے علاقوں میں واپس پہنچے ہیں، ان کا کہنا ہے کہ وہ مسلسل فضائی حملوں اور خوف کے سائے میں زندگی گزارنے پر مجبور ہیں۔

عالمی انسانی حقوق کی تنظیموں نے اس سنگین صورتحال پر شدید تشویش کا اظہار کیا ہے۔ انسانی حقوق کے اداروں کا کہنا ہے کہ شہری آبادیوں، مکانات اور پورے کے پورے دیہات کو جان بوجھ کر نشانہ بنانا اور انہیں دھماکوں سے اڑانا صریحاً جنگی جرائم اور بین الاقوامی انسانی قوانین کی سنگین خلاف ورزی کے زمرے میں آتا ہے۔