صرف ایک ہفتہ سوشل میڈیا چھوڑنے سے ذہنی صحت بہتر، تحقیق

ایک حالیہ تحقیق میں انکشاف ہوا ہے کہ صرف ایک ہفتے تک سوشل میڈیا کے استعمال میں نمایاں کمی نوجوانوں کی ذہنی صحت پر مثبت اثر ڈالتی ہے۔ محققین کے مطابق مختصر دورانیے کی یہ پابندی بے چینی، ڈپریشن اور نیند کے مسائل میں واضح کمی لانے کا سبب بنتی ہے۔

رپورٹ کے مطابق 14 سے 24 سال کے 295 نوجوانوں کا مشاہدہ کیا گیا، جنہوں نے اپنی روزانہ کی اسکرین ٹائم کو دو گھنٹے سے کم کرکے محض 30 منٹ کیا۔ ایک ہفتہ مکمل ہونے پر سروے سے معلوم ہوا کہ بے چینی کی علامات میں 16 فیصد، ڈپریشن میں تقریباً 25 فیصد اور بے خوابی میں ساڑھے 14 فیصد کمی ریکارڈ کی گئی، جبکہ یہ بہتری خاص طور پر اُن نوجوانوں میں نمایاں رہی جن میں ڈپریشن کی سطح پہلے سے زیادہ تھی۔

اس کے باوجود تحقیق نے یہ بھی واضح کیا کہ تنہائی کا احساس سوشل میڈیا کے کم استعمال کے باوجود برقرار رہا۔ ماہرین کے مطابق سوشل میڈیا کا استعمال کم کرنا مفید ضرور ہے، مگر اسے ذہنی صحت کا بنیادی علاج نہیں سمجھا جانا چاہیے۔

یہ تحقیق ہارورڈ میڈیکل اسکول کے نفسیات کے ایسوسی ایٹ پروفیسر، ڈاکٹر جان ٹوریٹس کی شراکت سے شائع ہوئی ہے۔