حاکم شارجہ کی نئی تاریخی کتاب ’’الجلندی‘‘ کی رونمائی، تصانیف کی تعداد 219 ہوگئی

متحدہ عرب امارات کی ریاست شارجہ کے حکمران اور سپریم کونسل کے رکن شیخ ڈاکٹر سلطان بن محمد القاسمی نے شارجہ انٹرنیشنل بک فیئر کے موقع پر اپنی نئی تاریخی تصنیف ’’الجلندی خالد بن سلطان القاسمی‘‘ کی باقاعدہ رونمائی کر دی ہے، جس کے بعد ان کی شائع شدہ تصانیف کی کل تعداد 219 ہو گئی ہے۔ 7 نومبر کو منعقدہ تقریبِ رونمائی میں شارجہ کے نائب حکمران، شارجہ بک اتھارٹی کی چیئرپرسن شیخہ بدور القاسمی اور عالمی ثقافتی شخصیات نے شرکت کی۔ پانچ ابواب پر مشتمل یہ ناول انیسویں صدی کے تاریخی کردار شیخ خالد بن سلطان القاسمی کی زندگی، اور شارجہ، رأس الخیمہ، مسقط اور خلیجی خطے کی سیاسی و بحری تاریخ کا احاطہ کرتا ہے۔ تقریب سے خطاب کرتے ہوئے حاکمِ شارجہ نے بتایا کہ انہوں نے یہ کتاب صرف 5 دن میں تحریر کی ہے تاکہ مصروف نوجوان نسل کو مختصر اور مستند ادبی شاہکاروں کے ذریعے مطالعے کی طرف راغب کیا جا سکے۔ 54 برسوں سے تحقیق سے وابستہ شیخ سلطان القاسمی نے جامعات کے محققین پر زور دیا کہ وہ تاریخ کی درست تدوین کے لیے زبانی روایات کی بجائے اصل مخطوطات اور بنیادی دستاویزات کو ترجیح دیں۔