خلیل الرحمٰن قمر کی بیٹی پر نامناسب لباس میں ڈانس ویڈیوز بنانے پر تنقید

پاکستانی ڈرامہ انڈسٹری کے نامور مصنف خلیل الرحمٰن قمر کی بیٹی اور سوشل میڈیا انفلوئنسر حجاب خلیل کے لباس اور ڈانس ویڈیوز پر سوشل میڈیا صارفین کی جانب سے شدید تنقید کی جا رہی ہے۔

خلیل الرحمٰن قمر، جنہوں نے پاکستان کے متعدد مقبول ترین ڈرامے تحریر کیے ہیں، اپنے تحریری کام اور خواتین کے حوالے سے دیئے گئے سخت بیانات اور موقف کے باعث اکثر متنازع رہے ہیں۔ وہ ماضی میں معروف اداکارہ صبا قمر سمیت دیگر فنکاروں کے لباس اور انداز پر علانیہ تنقید کرتے رہے ہیں۔ دوسری جانب ان کی بیٹی حجاب خلیل انسٹاگرام اور ٹک ٹاک پر ایک الگ شناخت بنا رہی ہیں۔ حال ہی میں ان کی کچھ ڈانس ویڈیوز وائرل ہوئیں جن میں وہ ایسے مغربی لباس میں نظر آئیں جس پر صارفین نے اعتراض اٹھایا۔

ان ویڈیوز کے وائرل ہوتے ہی سوشل میڈیا صارفین نے حجاب خلیل کے ذاتی انتخاب کو ان کے والد کے ماضی کے بیانات سے جوڑنا شروع کر دیا۔ متعدد صارفین نے طنزیہ تبصرے کرتے ہوئے کہا کہ خلیل الرحمٰن قمر جو دوسری خواتین کو اخلاقیات اور لباس کے حوالے سے ہدایات دیتے ہیں، انہیں پہلے اپنے گھر کی طرف توجہ دینی چاہیے۔ بعض صارفین نے صبا قمر پر کی گئی ان کی سابقہ تنقید کا حوالہ دیتے ہوئے انہیں شدید تنقید کا نشانہ بنایا، جس کے بعد سوشل میڈیا پر ایک نئی بحث چھڑ گئی ہے۔