امیتابھ بچن کی رہائش گاہ اور دلجیت دوسانجھ کے کنسرٹ کو نشانہ بنانے کی دھمکیاں

بھارت میں شوبز شخصیات اور فنکاروں کو جان سے مارنے کی دھمکیوں کا سلسلہ برقرار ہے، جہاں بالی ووڈ کے شہنشاہ امیتابھ بچن کی رہائش گاہ اور معروف پنجابی گلوکار دلجیت دوسانجھ کے کنسرٹ کو بم سے اڑانے کی دھمکیاں موصول ہوئی ہیں۔

گلف نیوز کی رپورٹ کے مطابق، ممبئی پولیس اور سیکیورٹی اداروں کو موصول ہونے والی ایک دھمکی آمیز ای میل میں امیتابھ بچن کے ممبئی میں واقع مشہور بنگلے ‘جلسہ’ کا تذکرہ کرتے ہوئے حملے کا خدشہ ظاہر کیا گیا ہے۔ اس کے علاوہ 27 نومبر کو منعقد ہونے والے گلوکار دلجیت دوسانجھ کے لائیو میوزک کنسرٹ، ممبئی کی میئر کے دفتر اور شہر کے مختلف اسکولوں کو بھی نشانہ بنانے کی کھلی دھمکی دی گئی ہے۔

دھمکی آمیز ای میل کے بعد ممبئی پولیس نے فوری اقدام کرتے ہوئے امیتابھ بچن کے گھر کی سیکیورٹی میں شدید اضافہ کر دیا ہے اور کنسرٹ کے مقام کی تلاشی شروع کر دی ہے۔ واضح رہے کہ گزشتہ دنوں بالی ووڈ اداکار ٹائیگر شروف بھی ایک قاتلانہ حملے میں بال بال بچے تھے، جبکہ اس سے قبل سپر اسٹار سلمان خان کی رہائش گاہ ‘گیلیکسی اپارٹمنٹ’ پر بھی فائرنگ کے سنگین واقعات پیش آ چکے ہیں۔