ریما خان کی فلمی دنیا میں واپسی، نئے میگا پراجیکٹ کا اعلان

پاکستان فلم انڈسٹری کی نامور اداکارہ اور 90ء کی دہائی کی سپر اسٹار ریما خان ایک طویل عرصے کے بعد ایک بار پھر بڑے پردے پر جلوہ گر ہونے کے لیے تیار ہیں۔ شادی کے بعد امریکہ منتقل ہو جانے اور اداکاری سے وقفہ لینے والی ریما خان معروف ہدایت کار و پروڈیوسر وجاہت رؤف کی نئی فلم ’پنچھی پیارے‘ کے ذریعے فلمی دنیا میں واپسی کر رہی ہیں۔ وجاہت رؤف نے انسٹاگرام پر اس خبر کا باضابطہ اعلان کرتے ہوئے ریما خان کے ساتھ کام کرنے پر مسرت کا اظہار کیا۔ اگرچہ فلم میں ان کے کردار اور کہانی کے حوالے سے تفاصیل فی الحال راز میں رکھی گئی ہیں، تاہم اس اعلان کے بعد شوبز انڈسٹری اور مداحوں میں خوشی کی لہر دوڑ گئی ہے، جبکہ عمران عباس، زویا ناصر اور علی رحمان خان سمیت متعدد شوبز شخصیات نے اس نئے سفر پر ریما خان اور وجاہت رؤف کو مبارکباد پیش کی ہے۔