وسیم اکرم کی موت کی افواہیں بے بنیاد، شنیرا اکرم کی تردید

قومی کرکٹ ٹیم کے سابق کپتان اور مایہ ناز فاسٹ بولر وسیم اکرم کی اہلیہ شنیرا اکرم نے سوشل میڈیا پر گردش کرنے والی ان تمام جعلی خبروں اور مصنوعی ذہانت (AI) سے تیار کردہ ویڈیوز کی سختی سے تردید کر دی ہے، جن میں دعویٰ کیا جا رہا تھا کہ وسیم اکرم دل کا دورہ پڑنے سے انتقال کر گئے ہیں۔ ان جھوٹی افواہوں اور جعلی ویڈیوز کے وائرل ہونے کے بعد دنیا بھر میں موجود کرکٹ ورلڈ کے مداحوں میں شدید تشویش اور بے چینی کی لہر دوڑ گئی تھی۔

ان بے بنیاد افواہوں کا کرپٹ جواب دینے کے لیے شنیرا اکرم نے سوشل میڈیا پر ایک تازہ ترین ویڈیو شیئر کی ہے، جس میں سوئنگ کے سلطان وسیم اکرم جم میں جم کر ورزش کرتے ہوئے نظر آ رہے ہیں۔ ویڈیو میں سابق کپتان کو مکمل فٹنس کے ساتھ مختلف مشکل ورزشیں، جیسے کہ کیبل پل ڈاؤنز، پل اپس اور باربیل فلور پریس کرتے ہوئے دیکھا جا سکتا ہے، اور ویڈیو کے آخر میں وہ کیمرے کی طرف دیکھ کر ہنستے اور مسکراتے بھی ہیں۔ شنیرا اکرم نے اس ویڈیو کے ساتھ اپنے پیغام میں لکھا، “یہ ریکارڈنگ میں نے سوشل میڈیا پر پھیلنے والی جعلی خبروں اور مصنوعی ذہانت (AI) کی مدد سے بنائی گئی جھوٹی ویڈیوز کے جواب میں شیئر کی ہے۔ جیسا کہ آپ سب خود دیکھ سکتے ہیں، وہ جم میں موجود ہیں اور بالکل ٹھیک ٹھاک اور خیریت سے ہیں۔”

شنیرا اکرم کی جانب سے اس وضاحتی ویڈیو کے سامنے آنے کے بعد کروڑوں مداحوں نے اطمینان کا سانس لیا ہے اور یہ بات پوری طرح واضح ہو گئی ہے کہ لیجنڈ کرکٹر مکمل طور پر صحت مند ہیں