‘موت ہر ایک کو آنی ہے، مگر پشتونوں کی عزت اور وقار کبھی نہیں مرتا’، شاہد آفریدی کا شاپور زدران کو خراج عقیدت

پاکستان کرکٹ ٹیم کے سابق کپتان شاہد آفریدی نے افغانستان کے سابق فاسٹ بولر شاپور زدران کے انتقال پر گہرے دکھ اور افسوس کا اظہار کیا ہے۔ شاہد آفریدی نے اپنے آفیشل فیس بک پیج پر جاری کردہ تعزیتی بیان میں قرآنی آیت کا حوالہ دیتے ہوئے لکھا کہ “بے شک ہم اللہ ہی کے ہیں اور اسی کی طرف ہمیں لوٹ کر جانا ہے، پیارے شاپور، آپ ہمیشہ ہمارے دلوں میں زندہ رہیں گے۔ اللہ تعالیٰ آپ پر اپنی رحمت نازل فرمائے اور آپ کو جنت الفردوس میں اعلیٰ مقام عطا فرمائے۔” شاہد آفریدی نے پشتون کلچر کو زبردست خراجِ عقیدت پیش کرتے ہوئے مزید لکھا کہ موت ہر انسان کو آنی ہے، مگر پشتونوں کی عزت اور وقار کبھی نہیں مرتا۔ موت جسم کو ہم سے جدا کر سکتی ہے، مگر پشتونوں کا معاشرتی ضابطۂ حیات ہمیشہ زندہ رہتا ہے۔

یاد رہے کہ افغانستان کے 38 سالہ سابق مایہ ناز فاسٹ بولر شاپور زدران طویل علالت کے بعد منگل کے روز نئی دہلی کے ایک اسپتال میں انتقال کر گئے تھے، وہ کینسر کے موذی مرض میں مبتلا اور بھارت میں زیرِ علاج تھے۔ بائیں ہاتھ کے اس فاسٹ بولر نے 44 ون ڈے اور 36 ٹی ٹونٹی انٹرنیشنل میچز میں افغانستان کی نمائندگی کی، اور 2015 کے آئی سی سی کرکٹ ورلڈ کپ میں اسکاٹ لینڈ کے خلاف تاریخی فاتحانہ رنز بنا کر اپنی ٹیم کو ورلڈ کپ کی پہلی یادگار فتح دلائی تھی۔ ان کے انتقال پر دنیائے کرکٹ کے کھلاڑیوں، حکام اور شائقین کی جانب سے تعزیت کا سلسلہ جاری ہے