ویسٹ انڈیز اور انگلینڈ میں سیریز جیتنا ہدف ہے؛ اسکواڈ میں کوئی سیکنڈ چوائس کھلاڑی نہیں،

پاکستان کرکٹ ٹیم کے ریڈ بال ہیڈ کوچ سرفراز احمد نے راولپنڈی کرکٹ اسٹیڈیم میں میڈیا سے گفتگو کرتے ہوئے کہا ہے کہ ویسٹ انڈیز اور انگلینڈ کے اہم دوروں پر سیریز جیتنا ہمارا بنیادی ہدف ہے۔ انہوں نے بتایا کہ ویسٹ انڈیز میں راولپنڈی جیسا حبس زدہ موسم متوقع ہے، جس کے پیشِ نظر کنڈیشنز کے مطابق اسکواڈ منتخب کر کے گھاس اور اسپنرز کے لیے سازگار پچز پر بھرپور پریکٹس کی گئی ہے۔ سرفراز احمد کا کہنا تھا کہ اسکواڈ میں شامل تمام کھلاڑی ہماری ‘فرسٹ چوائس’ ہیں؛ بابر اعظم کے تجربے پر پورا بھروسہ ہے جبکہ کپتان شان مسعود بھی سیریز کے لیے انتہائی بااعتماد ہیں۔ محمد رضوان کی فٹنس کے حوالے سے انہوں نے تصدیق کی کہ وہ ری ہیب کے بعد اب مکمل فٹ ہیں اور ان کے تجربے سے ٹیم کو بڑا فائدہ ہوگا۔ ماضی کی کارکردگی کا حوالہ دیتے ہوئے انہوں نے یاد دلایا کہ 2016 اور 2018 میں کاکول ٹریننگ کے بعد دورہ انگلینڈ میں ٹیم کی کارکردگی شاندار رہی تھی، اور اگرچہ انگلینڈ کی کنڈیشنز ہمیشہ مشکل ہوتی ہیں، مگر اس بار بھی کھلاڑیوں کی محنت رنگ لائے گی۔ انہوں نے مزید کہا کہ ڈومیسٹک کے پرفارمر علی عثمان کو اسکواڈ میں موقع دیا گیا ہے، جبکہ وہ غازی غوری، روحیل نزیر اور سعد بیگ جیسے ابھرتے ہوئے نوجوان وکٹ کیپرز کے ساتھ اپنا تجربہ شیئر کرنے کے لیے مسلسل کوشاں ہیں۔