قومی ٹیم کی قیادت میرے لیے اعزاز، قوم کو فتح کا تحفہ دیں گے، صاحبزادہ فرحان

پاکستان کی ٹی 20 کرکٹ ٹیم کے نئے مقرر کردہ کپتان صاحبزادہ فرحان نے کہا ہے کہ قومی ٹیم کی قیادت کا اعزاز ملنا ان کے لیے انتہائی باعثِ فخر ہے اور وہ میدان میں فرنٹ لائن سے قیادت کرتے ہوئے ہر میچ میں بہترین کارکردگی کا مظاہرہ کریں گے۔ اسلام آباد میں ایک پریس کانفرنس سے خطاب کرتے ہوئے انہوں نے شائقین کو یقین دلایا کہ ٹیم انہیں مایوس نہیں کرے گی اور ہر مقابلے میں فتح حاصل کر کے قوم کو تحفہ دینے کی بھرپور کوشش کی جائے گی۔

صاحبزادہ فرحان کا کہنا تھا کہ بین الاقوامی کرکٹ میں دباؤ لازمی ہوتا ہے لیکن اسے کارکردگی پر حاوی نہیں ہونے دینا چاہیے۔ انہوں نے اسکاڈ کے کمبینیشن پر اطمینان کا اظہار کرتے ہوئے کہا کہ فخر زمان اور شاداب خان جیسے تجربہ کار کھلاڑیوں کی واپسی سے ٹیم کو استحکام ملا ہے، جبکہ احسن نواز اور معاذ صداقت جیسے جارحانہ مزاج رکھنے والے نوجوان کھلاڑی ٹیم کی اہم ضرورت ہیں۔ قومی کپتان کے مطابق ایک متوازن اور بہترین کمبینیشن تیار ہو چکا ہے جو آنے والی سیریز میں کامیابی حاصل کرنے کے لیے مکمل طور پر پرعزم ہے۔