ملائیشین وزیراعظم سے من گھڑت بیانیہ نکلوانے کی بھارتی کوشش ناکام، انٹرویو پھر سرخیوں میں

دہشت گردی کے معاملے پر پاکستان کو عالمی سطح پر بدنام کرنے اور بے بنیاد الزام تراشی کی بھارتی کوششوں کو ایک بار پھر عالمی برادری کے سامنے شدید سبکی کا سامنا کرنا پڑا ہے۔ عالمی پالیسی مشاورتی ادارے ‘دی ڈومینین اسٹریٹیجیز’ (The Dominion Strategies) نے ملائیشیا کے وزیرِ اعظم انور ابراہیم کے انٹرویو کی ویڈیو سوشل میڈیا پلیٹ فارم ‘ایکس’ (سابقہ ٹوئٹر) پر شیئر کرتے ہوئے افشا کیا ہے کہ بھارتی میڈیا نے ملائیشین وزیرِ اعظم کو پاکستان کے خلاف ہٹ دھرمی اور الزام تراشی پر مجبور کرنے کی بھرپور کوشش کی، تاہم یہ مذموم کوشش مکمل طور پر ناکام رہی۔

عالمی ادارے کے مطابق ملائیشیا کے وزیرِ اعظم انور ابراہیم نے ‘ریاستی سرپرستی میں دہشت گردی’ سے متعلق پاکستان پر عائد کردہ تمام بھارتی الزامات کو ماننے سے صاف انکار کر دیا۔ انور ابراہیم نے پاکستان کو ایک عظیم ملک قرار دیتے ہوئے اس کی شاندار تاریخ، ثقافت اور تہذیب کی کھلے دل سے تعریف کی۔ مزید برآں، ملائیشین وزیرِ اعظم انور ابراہیم نے عالمی پالیسی ادارے ‘دی ڈومینین اسٹریٹیجیز’ کی اس پوسٹ کی خود تائید کی اور اسے اپنے رسمی ایکس ہینڈل سے ری پوسٹ بھی کیا، جس سے بھارتی میڈیا کی جانب سے پھیلائے جانے والے منفی پروپیگنڈے کا پول کھل گیا ہے۔